مائیکرو سافٹ کمپنی پندرہ مارچ سے ایم ایس این میسنجر یعنی ونڈوز لائیو میسنجر سروس کو بند کر رہی ہے۔
مائیکرو سافٹ نے ایک ای میل کے ذریعے صارفین کو آگاہ کیا ہے کہ پندرہ مارچ کو ونڈوز لائیو میسنجر پر جب آپ لاگ ان ہونگے تو یہ کام نہیں کر رہا ہوں گا اور صارفین کو لازمی طور پر سکائپ میسیجنگ کی جانب جانا پڑے گا۔مائیکرو سافٹ کی جانب سے اکتوبر سال دو ہزار گیارہ میں سکائپ کو آٹھ ارب پچاس کروڑ ڈالر میں حاصل کرنے کے نتیجے میں ونڈوز لائیو میسنجر کی سروس بند کی جا رہی ہے۔سنہ 2009 میں کمپنی نے کہا تھا ونڈوز لائیو میسنجر کے 330 ملین صارفین ہیں۔
کمپنی کے اس اقدام سے یہ بات صاف ظاہر ہے کہ وہ سکائپ پر زیادہ توجہ دینا چاہ رہے ہیں۔
ونڈوز لائیو میسنجر1999 میں لانچ کیا گیا اور وقت گزرنے کے ساتھ ساتھ اس میں فوٹو بھیجنے، ویڈیو کالز کرنے اور گیمز کھیلنے کا اضافہ کیا گیا۔
انٹرنیٹ کے تجزیے کی کمپنی کومسکور کا کہنا ہے کہ ونڈوز لائیو میسنجر کے صارفین کی تعداد سکائپ سے دو گنا زیادہ ہے۔
لیکم کومسکور کا کہنا ہے کہ امریکہ میں ونڈوز لائیو میسنجرکے صارفین میں 48 فیصد کمی واقع ہوئی ہے جبکہ سکائپ کے صارفین میں کافی اضافہ ہوا ہے۔
مائیکروسافٹ نے ونڈوز لائیو میسنجر کے صافرین کے لیے ایک ٹول متعارف کرایا ہے جس کے ذریعے وہ اپنے کانٹیکٹس سکائپ پر منتقل کرسکتے ہیں۔
مائیکرو سافٹ نے صارفین کو میسنجر سے سکائپ پر منتقل ہونے کے لیے مدد فراہم کی ہے اور اس ضمن میں میسنجر پر ایک بٹن کا اضافہ کیا گیا ہے جس کو کک کر کے میسنجر کو خارج کر کے اس کی جگہ سکائپ کو لایا جا سکتا ہے۔
مائیکرو سافٹ کا کہنا ہے کہ پندرہ مارچ سے پہلے ایم ایس این میسنجر معمول کے مطابق کام کرتا رہے گا۔ایم ایس این میسنجر یعنی فوری پیغام رسانی کی سروس کو سنہ انیس سو ننانوے میں شروع کیا گیا تھا۔خیال کیا جاتا ہے کہ ہر ماہ اس سروس کو تیس کروڑ افراد استعمال کرتے ہیں۔ پندرہ مارچ کے بعد چین وہ واحد ملک ہو گا جہاں ایم ایس این میسنجر کام کرتا رہے گا کیونکہ وہاں یہ سروس لائسنس کے تحت چلتی ہے۔
