Inpage 2.4
Inpage میں کام کرتے ہوئے بعض اوقات آپ چاہتے ہیں کہ کی بورڈ کے کچھ بٹن تبدیل کیے جائیں، مثلاً یہ کہ ش کا حرف Shift+c دبانے سے نہیں بلکہ Shift+s دبانے سے لکھا جائے۔ اردو حروف کو اپنی مرضی کے انگلش حروف کے ساتھ ٹائپ کرنے کے لیے Inpage کے اندر کی بورڈ تبدیل کرنے کی سہولت مہیا کی گئی ہے۔
1- کی بورڈ لے آؤٹ منتخب کرنے کا ڈائیلاگ باکس کھولیں
مندرجہ ذیل تصویر کی مدد سے وہ ڈائیلاگ باکس کھولیں جس میں آپ Keyboard Layout منتخب کر سکتے ہیں:
2- قابل ترمیم کی بورڈ لے آؤٹ منتخب کریں
مندرجہ ذیل تصویر کی مدد سے ڈائیلاگ باکس میں دیے گئے ڈراپ ڈاؤن میں سے آپ User Defined Keyboard منتخب کریں جس کے بٹن آپ اپنی مرضی کے مطابق تبدیل کر سکتے ہیں۔
3- کی بورڈ کے بٹنوں کی ترتیب سیٹ کریں
مندرجہ ذیل تصویر میں جو ڈائیلاگ باکس آپ دیکھ رہے ہیں یہ دو حصوں میں تقسیم کیا گیا ہے۔ نیچے والے حصے میں وہ تمام حروف اور علامات موجود ہیں جو اِن پیج کے اندر استعمال کے لیے دستیاب ہیں۔ جبکہ اوپر والا حصہ یہ بتاتا ہے کہ کونسا انگلش بٹن دبانے سے اردو کا کونسا حرف لکھا جائے گا۔ ان بٹنوں کو حسب ضرورت تبدیل کیا جا سکتا ہے۔ اس کے لیے آپ نیچے والے حصے میں موجود کسی بھی اردو حرف یا علامت کو ماؤس کی مدد سے گھسیٹ کر (Drag کر کے) اوپر والے حصے میں کسی انگلش بٹن کے اوپر چھوڑ (Drop کر) دیں۔ اگر آپ اردو کا کوئی حرف انگلش کے بڑے حرف (Capital letter) پر رکھیں گے تو یہ حرف Shift بٹن کے ساتھ دبانے سے لکھا جائے گا۔ یعنی مہیا کی گئی تصویر کے مطابق ڈ کا حرف کی بورڈ پر Shift+d دبانے سے لکھا جائے گا۔ جبکہ د کا حرف صرف d دبانے سے لکھا جائے گا۔ جب آپ کی بورڈ کو اپنی مرضی کے مطابق ڈھال لیں تو موجودہ ڈائیلاگ باکس کو بند کرنے کے لیے Save پر کلک کریں، اور پھر اِس ڈائیلاگ کے پیچھے موجود کی بورڈ لے آؤٹ منتخب کرنے والے ڈائیلاگ باکس کو بند کرنے کے لیے OK پر کلک کریں۔ اب آپ Inpage کے اندر ٹائپنگ کر کے تسلی کر لیں کہ اُردو کے حروف آپ کی مرضی کے انگلش بٹنوں کے ساتھ لکھے جا رہے ہیں۔
