پنجابی خبراں

[اسداللہ شاہ]

گورنر پنجاب سلمان تاثیر نے کہیا اے کہ پنجاب حکومت عقل نال کم لیندیاں پلازیاں نوں گران دا کم روک کے لاہور دے شہریاں اتے جاری ڈرون حملے روک دیوے۔ ایہہ گل اونہاں نے پنجاب حکومت ولوں گرائے جان والے پلازیاں دے دورے اتے میڈیا نال گل بات کردیاں کیتی۔ گورنر پنجاب نے کہیا کہ پہلے ای دہشت گردی دی وجہ توں سرمایہ کار ملک توں باہر جارئے نیں تے جیڑے لوک ایتھے اپنا سرمایہ لاچکے نیں اونہاں دیاں املاک گرا کے شہر نوں قبرستان بنان دی کوشیش کیتی جارئی اے۔ اونہاں دا کہنا سی کہ جے کسے نے غیر قانونی کم کیتا اے تے اونہوں ایہدے بدلے وچ جرمانہ کیتا جانا چائیدا اے۔ پنجاب حکومت دے وزراء ولوں اونہاں دے خلاف بیاناں بارے گورنر پنجاب دا کہنا سی کہ شیر جدوں وی باہر نکل دا اے تے ایہہ لوک خوفزدہ ہوجاندے نیں۔ اسی کوشیش کیتی سی کہ ایہہ سمجھ جان پر اج اسی وی شہریاں دے نال باہر آئے آں۔ اک سوال دے جواب وچ اونہاں نے کہیا کہ اوہ پنجاب حکومت ولوں گرائے جارئے پلازیاں دی مسماری روکن دا نئیں کہہ سکدے کیوں جے ایہہ عدالت دے حکم اتے کیتا جارئیا اے۔

[اسداللہ شاہ]

لاہور تے گردونواح وچ دھند دا سلسلہ جاری اے جدی وجہ نال سردی دی شدت وچ وی اضافہ ہوگیا اے۔ لاہور تے پنجاب دے دوجے علاقیاں وچ دھند دی وجہ نال گڈیاں نوں سفر کرن وچ شدید مشکلات دا سامنا کرنا پئے رئیا اے۔ محکمہ موسمیات دے مطابق دھند دا ایہہ سلسلہ آئندہ تن دن تک جاری رئے گا جدکہ لاہور تے پنجاب وچ موسم سرد تے خشک رہن دا امکان اے۔ ایس حوالے نال ڈائریکٹر موسمیات لاہور میاں محمد اجمل شاد نے دسیا کہ آئندہ چند دناں وچ ملک دے مختلف حصیاں جنہاں وچ پنجاب وی شامل اے بارش ہوسکدی اے جدکہ پنجاب وچ بارش دا کوئی امکان نئیں

[اسداللہ شاہ]

جنرل (ر) حمید گل نے کہیا اے کہ جمہوریت، جہاد دا جذبہ تے جوہری طاقت دی موجودگی وچ ملک کمزور نئیں ہوسکدا۔ ایہہ گل اونہاں نے لاہور وچ نظریہ پاکستان فاؤنڈیشن دے زیراہتمام تقریب نال خطاب کردیاں کیتی۔ جنرل(ر) حمید گل نے کہیا کہ پاکستان دے عوام بونے لیڈران دے سائے تھلے زندگی گزارن اتے مجبور ہوگئے نیں اک دے جان نال دوسرا اچھا آئے گا ایدی توقع نئیں کیتی جاسکدی۔ اونہاں نے کہیا کہ امریکہ تے بھارت پاکستان توں خائف نیں ایس لئی اوہ پاکستان نوں دباؤ وچ رکھنا چاہندے نیں۔ اونہاں دا کہنا سی کہ بھارتی جرنیلاں دے بیانات توں ایہہ ثابت ہورئیا اے کہ بھارت وچ جمہوریت کمزور ہورئی اے۔ اونہاں نے کہیا کہ پاکستان دی اعلٰی درجے دی مسلح افواج تے بہترین انٹیلی جنس دی وجہ نال کوئی اینہوں میلی اکھ نال نئیں ویکھ سکدا۔ جنرل(ر) حمید گل نے کہیا کہ امریکہ نوں افغانستان وچ شکست ہوچکی اے تے اوہ واپسی دی تیاری وچ اے۔ پاکستان نوں ایسی صورتحال نوں سامنے رکھدیاں آئندہ دی پالیسی بنانا ہوئے گی۔

[اسداللہ شاہ]

سپریم کورٹ دے جج جسٹس خلیل الرحمٰن رمدے دی اہلیہ دی نماز جنازہ ہفتے دے روز لاہور ریس کورس پارک وچ ادا کیتی گئی۔ نماز جنازہ وچ چیف جسٹس آف پاکستان افتخار محمد چودھری، مسلم لیگ ن دے قائد میاں نواز شریف، وزیر اعلٰی پنجاب میاں شہباز شریف، چیف جسٹس لاہور ہائیکورٹ خواجہ محمد شریف، سابق صدر پاکستان رفیق تارڑ، سپیکر پنجاب اسمبلی رانا محمد اقبال، مجید نظامی، عارف نظامی، ایس ایم ظفر، ضلعی ناظم میاں عامر محمود، میاں اسلم اقبال، کمشنر لاہور خسرو پرویز، ڈی سی او لاہور سجاد بھٹہ، آئی جی پنجاب طارق سلیم، خواجہ احمد حسان، اسحاق ڈار، خورشید قصوری، سابق گورنر پنجاب خالد مقبول تے وکلاء دی وڈھی تعداد نے شرکت کیتی۔ مرحومہ دی نماز جنازہ اونہاں دے خاوند جسٹس خلیل الرحمٰن رمدے نے پڑھائی۔ مرحومہ دی تدفین اونہاں دے آبائی پنڈ وچ کیتی جائے گی۔ ایس موقع اتے سیکورٹی دے سخت انتظامات کیتے گئے سن۔

[اسداللہ شاہ]

خاکسار تحریک دے سربراہ تے قائد حمیدالدین المشرقی حرکت قلب بند ہون نال لاہور وچ انتقال کر گئے نیں۔ مرحوم حمیدالدین المشرقی دی طبیعت اچانک خراب ہوئی جدے بعد اونہاں نوں پنجاب انسٹی ٹیوٹ آف کارڈیالوجی لے جایا گیا جتھے اوہ جانبر نہ ہوسکے تے 53 برس دی عمر وچ اپنے خالق حقیقی نال جا ملے۔ مرحوم نے 1993 وچ خاکسار تحریک دی قیادت سنبھالی سی تے اونہاں نے عدلیہ دی بحالی، میڈیا دی آزادی تے بحالی، آمریت دے خلاف تحریک سمیت مختلف قومی تحریکاں وچ بھرپور حصہ لیندے رئے۔ مرحوم پچھلے کجھ عرصے توں ہر اتوار نوں لاہور پریس کلب دے باہر مہنگائی، بدامنی، دہشتگردی، غیر ملکی مداخلت دے خلاف احتجاجی مظاہرہ کردے سن۔ مرحوم دے پسماندگان وچ بیوہ، 2 بیٹے تے اک بیٹی اے۔ حمیدالدین المشرقی دے انتقال اتے مختلف مذہبی تے سیاسی رہنماواں نے گہرے دکھ تے غم دا اظہار کیتا اے۔

[اسداللہ شاہ]

امیر جماعت اسلامی پاکستان سید منور حسن نے 11جنوری نوں امریکی عدالت ولوں ڈاکٹر عافیہ صدیقی نوں سزا سنائے جان دی خبراں اتے سخت تشویش دا اظہار کیتا اے۔ اونہاں نے حکومت پاکستان نوں متنبہ کیتا اے کہ جے عافیہ صدیقی نوں سزا دتی گئی تے ایہدے خلاف ملک بھر وچ وسیع پیمانے اتے احتجاج کیتاجائے گا۔ منصورہ لاہور توں جاری کردہ اونہاں نے اک بیان وچ کہیا کہ اطلاعات دے مطابق امریکی عدالت11جنوری نوں ڈاکٹر عافیہ صدیقی نوں 120سال قید دی سزاسنان جا رئی اے۔ اونہاں دا کہنا سی کہ قوم دا فرض اے کہ اوہ اسلام تے پاکستان دی بیٹی دی حمایت وچ سڑکاں اتے آن تے حکمراناں دی بے حمیتی دے خلاف آواز بلند کرن۔ اونہاں نے کہیا کہ ڈاکٹر عافیہ نوں مسلمان تے پاکستانی ہون دی سزا دتی جارئی اے۔

[اعجازالحسینی]

توا ڈی مہربانی

[اسداللہ شاہ]

جمیعت علماء اسلام فضل الرحمٰن گروپ دے امیر مولانا فضل الرحمٰن نے کہیا اے کہ پاکستان اتے ڈرون حملے ملکی سلامتی تے خودمختاری دے منافی نیں تے ایس حوالے نال حکومت نوں اپنی پالیسی اتے نظر ثانی کرن دی ضرورت اے۔ ایہہ گل اونہاں نے لاہور وچ میڈیا نال گل بات کردیاں کیتی۔ اونہاں دا کہنا سی کہ دہشتگردی دی جنگ وچ پاکستان عالمی برادری دا حصہ نئیں اے تے ایہہ جنگ مشرف دا ذاتی فیصلہ سی۔ فضل الرحمٰن نے کہیا کہ قبائلی علاقیاں وچ روز حملے ہورئے نیں بلکہ ہن تے اک اک دن وچ کئی کئی حملے ہورئے نیں۔ اونہاں نے کہیا کہ ساڈھے ملک وچ جمہوریت کمزور، آمریت طاقتور اے تے جمہوری عمل اپنے تسلسل دے نال ای طاقتور ہوسکے گا ہن ملک وچ سیاسی استحکام سی ضرورت اے۔ جے یو آئی دے امیر دا کہنا سی کہ بجلی، گیس دی لوڈشیڈنگ دی وجہ توں ساڈھی معیشت کمزور ہوگئی اے جدوں تک اسی اپنے اتے ایہہ نام نہاد دہشتگردی دے خلاف جنگ مسلط کری رکھاں گے اسی معاشی طور اتے مضبوط نئیں ہوسکدے۔ اونہاں نے کہیا کہ مسلم لیگ ن تے پیپلز پارٹی وچ کوئی محاذ آرائی نئیں تے دونویں جماعتاں مل کے ملک چلا رئیاں نیں جدکہ چھوٹے موٹے اختلافات ہوندے رہندے نیں۔ فضل الرحمٰن نے کہیا کہ جمہوریت دے خلاف کسے وی قسم دی سازش نوں کامیاب نئیں ہون دتا جائے گا۔ اونہاں نے کہیا کہ ایس ویلے ملک حالت جنگ وچ اے تے ملک نوں بچان لئی ساریاں جماعتاں نوں متحد ہون دی ضرورت اے۔

[اسداللہ شاہ]

لاہور دی بے ہنگم ٹریفک دی وجہ توں شہری سخت پریشان نیں تے ٹریفک پولیس ٹریفک نوں کنٹرول کرن وچ ناکام ہوگئی اے۔ دہشت گردی دے ہون والے واقعات توں بعد سیکورٹی دے پیش نظر لاہور پولیس نے شہر دیاں کئی سڑکاں اتے جگہ جگہ بیرئیر لاکے سڑکاں نوں بند کیتا ہویا اے جدی وجہ توں وی سڑک اتے ٹریفک جام ہوجاندی اے جدکہ لاہور دیاں تمام وڈھیاں سڑکاں دے داخلی تے خارجی رستیاں اتے وی سارا دن ٹریفک پھنسی ہوئی وکھائی دیندی اے۔ ایس حوالے نال شہریاں نے کہیا کہ ٹریفک دا سسٹم بہت خراب اے تے حکومت نوں ٹریفک کنٹرول کرن لئی بہتر حکمت عملی اختیار کرنی چائیدی اے جدکہ ٹریفک وارڈن دا کہنا اے کہ سکولاں تے کالجاں وچ چھٹی دے وقت ٹریفک دا رش ہوجاندا اے جدی وجہ توں ٹریفک جام ہوندی اے۔

[اسداللہ شاہ]

لاہور ہائیکورٹ نے وزیر داخلہ رحمان ملک دی عبوری ضمانت وچ توسیع کردتی اے۔ عدالت نے رحمان ملک نوں 25 فروری دے روز طلب کیتا اے۔ منگل دے روز رحمان ملک دے وکیل نے عدالت دے روبرو موقف اختیار کیتا کہ کیس دے حوالے نال اونہاں دی تیاری ہجے مکمل نئیں ایس لئی سماعت دی نویں تاریخ دتی جائے۔ جدے اتے عدالت نے رحمان ملک دی عبوری ضمانت وچ توسیع کردیاں کیس دی سماعت 25 فروری تک ملتوی کردتی۔ واضح روے کہ وزیر داخلہ رحمان ملک دے خلاف 1994 تے 1995 وچ جدوں اوہ ایف آئی اے وچ ڈپٹی ڈائریکٹر سن دو مقدمات درج ہوئے سن۔ اک مقدمہ رشوت لین دے الزام جدکہ دوجا اک گھر اتے ریٹ دے دوران دس لکھ نقدی تے سونا غائب کرن دے حوالے نال درج ہوئیا سی۔ رحمان ملک نے این آر او دے تحت اینہاں مقدمات نوں ختم کرایا سی۔ پیشی توں بعد رحمان ملک نے میڈیا دے سامنے کیس دی تفصیلات دسن توں انکار کردیاں کہیا کہ عدالتی کاروائی جاری اے تے اوہ ہجے ایس بارے کجھ کہنا نئیں چاہندے۔

[اسداللہ شاہ]

لاہور وچ سرور روڈ پولیس نے کرنل اکرام دی ہلاکت دے ذمہ دار چیف سیکرٹری دے ڈرائیور نوں گرفتار کرلتا اے۔ واضح روے تن دن پہلاں چیف سیکرٹری پنجاب جاوید دے ڈرائیور غلام مصطفٰی نے گڈی دی ٹکر مار کے موٹر سائیکل سوار علامہ اقبال اوپن یونیورسٹی دے استاد کرنل ریٹائرڈ اکرام نوں اوس ویلے ہلاک کردتا سی جدوں چیف سیکرٹری پنجاب وزیراعظم پاکستان نوں ائیرپورٹ چھڈن توں بعد واپس آرئے سن۔ ایس وقوعہ توں بعد سرور روڈ پولیس نے خود ای مدعی بن کے ملزم ڈرائیور دے خلاف مقدمہ درج کرلتا سی جدکہ ڈرائیور موقع توں فرار ہوگیا سی۔ متوفی دے بیٹے اعظم نے الزام لایا اے کہ پولیس ملزم نال ملی ہوئی اے تے اونہاں دے موقف نوں نظر انداز کردیاں پولیس نے خود ای مقدمہ درج کیتا اے۔

[اسداللہ شاہ]

لاہور وچ تحریک حُرمت رسول ولوں پنجاب اسمبلی دے سامنے احتجاجی مظاہرہ کیتا گیا جدے وچ مختلف سیاسی تے دینی جماعتاں دے رہنماواں تے کارکناں دی وڈھی تعداد نے شرکت کیتی۔ مظاہرین نے ناروے دے اخبار وچ اک واری فیر توہین آمیز خاکے شائع کرن اُتے شدید احتجاج کیتا تے شدید نعرے بازی کیتی۔ ایس موقع اُتے تحریک حُرمت رسول دے رہنماواں ڈاکٹر فرید پراچہ، مولانا امیر حمزہ، مولانا امجد خان، اعجاز احمد چودھری تے دوجے مقرراں دا کہنا سی کہ حکومت پاکستان توہین آمیز خاکے شائع کرن اُتے ناروے نال سفارتی تعلقات ختم کیتے جان۔ بعدازاں تحریک حُرمت رسول دے رہنماواں دے وفد نے سپیکر پنجاب اسمبلی رانا محمد اقبال خان نال ملاقات کیتی تے اونہاں نوں ایس حوالے نال اک یادداشت پیش کیتی۔ تحریک حُرمت رسول دے رہنماواں دا کہنا سی کہ سپیکر نے اونہاں نوں یقین دوایا اے کہ ایس حوالے نال پنجاب اسمبلی وچ مذمتی قرارداد منظور کیتی جائے گی۔