پوچھا صدف تو آنکھ جھکا کر دکھا دیا​ (عدیم ہاشمی​)

[محمد شعیب]

پوچھا صدف تو آنکھ جھکا کر دکھا دیا​
پوچھا گوہر تو اشک بہا کر دکھا دیا​
​
پوچھا کہ اتنے پھول بہاروں میں کس طرح​
اس نے عدیم خود کو ہنسا کر دکھا دیا​
​
پوچھا کہ شب کو چاند نکلتا ہے کس طرح​
رخ سے نقاب اس نے ہٹا کر دکھا دیا​
​
پوچھا کہ آفتاب کو چھاؤں کبھی ملی​
بالوں کو اس نے رخ پہ گرا کر دکھا دیا​
​
پوچھا کہاں سے آئی دھنک آسمان پر​
آنچل ہوا میں اس نے اڑا کر دکھا دیا​
​
پوچھا کے حوض شب میں کیا غسل نور بھی​
تب اس نے چاندنی میں نہا کر دکھا دیا​
​
پوچھا کہ مجھ کو وعدہ شکن کہہ دیا ہے کیوں​
اس نے عدیم خط میرا لا کر دکھا دیا​

عدیم ہاشمی​