نواب شاہ …نواب شاہ شہر اور گردونواح میں زلزلے سے کئی مکانوں کی دیواریں گرگئیں،جس کے نتیجے میں دو افراد جاں بحق اور ستر سے زیادہ زخمی ہو گئے۔ضلع بھر میں تعلیمی ادارے بند کردیئے گئے۔انٹرمیڈیٹ کے پرچے ملتوی کردیئے گئے ہیں۔رپورٹ کے مطابق نواب شاہ میں صبح سویرے زلزلے نے شہریوں کی نیندیں اڑادیں۔ دیواریں گرنے سے دو افراد جاں بحق، خواتین اور بچوں سمیت 70افراد زخمی ہوگئے۔ ضلع بھر میں آج اسکول بند ہیں۔صبح 3 بج کر 55 منٹ پرنواب شاہ اور گردونواح کے علاقے لرز اٹھے۔لوگ خوفزدہ ہوکر گھروں سے باہر نکل آئے جن میں ایسی خواتین بھی شامل تھیں جو بچوں کو گود میں لئے ہوئے تھیں۔4.3 شدت کے زلزلے نے کئی گھروں کو نقصان پہنچایا،مختلف علاقوں میں دیواریں گرنے سے درجنوں افراد زخمی ہوگئے۔ زخمیوں میں خواتین اور بچے بھی شامل ہیں۔ زلزلے کے بعد سے آفٹر شاکس کا سلسلہ جاری ہے۔جس سے لوگوں میں شدید خوف و ہراس پایا جاتا ہے۔ زلزلے کا مرکز نوابشاہ سے 27 کلو میٹر شمال مشرق کی جانب تھا۔جبکہ گہرائی 15 کلومیٹر رکارڈ کی گئی۔ زخمیوں کو اسپتال لانے کا سلسلہ جاری ہے۔ضلعی انتظامیہ کی جانب سے اسپتالوں میں ایمرجنسی نافذ کر دی گئی ہے۔
