قاہرہ…مصر میں فوج کی معزول صدرمرسی کے حامیوں کے پر امن دھرنے پرفائرنگ کے نتیجے میں 150 افراد مارے گئے، اس صورت حال پرنائب صدرمحمد البرادعی نے عہدے سے استعفی دیدیا ہے جبکہ مصر میں ایک ماہ کے لیے ایمرجنسی بھی نافذ کردی گئی ہے۔ دریائے نیل کے کناریآباد مصر کے دارالحکومت قاہرہ میں آمریت نے آج پھرجمہوریت کو روند ڈالا، بدھ کو ایک ماہ سے پرامن دھرنوں کے دو مقامات مسجد رابعہ العدویہ اور النہضہ اسکوائر پرمصری فوج نے بدترین تشدد کی مثال قائم کردی۔ فوج نے نہتے شہریوں پر ٹینک چڑھائے اور پھراندھادھند فائر کھول دیا۔ آزاد ذرائع کے مطابق مرسی کی بحالی کے 124 خواہشمندوں کو موت کے گھاٹ اتار دیا گیا۔ تاہم اخوان المسلمون کا کہنا ہے کہ فائرنگ سے مارے جانے والوں کی تعداد 500 سے زیادہ ہے جبکہ سینکڑوں افراد زخمی ہیں۔ اس وحشیانہ فائرنگ کے باعث برطانوی ٹی وی کا چیف کیمرہ مین ”مک ڈی این“ بھی ہلاک ہوگیا۔ گولیوں کی بوچھاڑ کے بعد طاقت کامزید مظاہرہ کرتے ہوئے احتجاجی کیمپوں کو بکتربند گاڑیوں اور ٹینکوں کے ذریعے اکھاڑدیاگیا، نہتے شہریوں کی لاشیں دیکھ کر مشتعل مظاہرین نے کچھ سڑکیں بلاک کیں اور گاڑیوں کو آگ لگائی۔ بعد میں صدارتی محل کی جانب سے ایک ماہ کے لیے ایمرجنسی نافذ کرنے کا فرمان جاری کردیا گیا۔ اسکے علاوہ مصری حکومت نے قاہرہ اور اسکندریہ سمیت 10 صوبوں میں کل صبح تک کرفیو بھی نافذ کردیا ہے ۔
