ایک امریکی عدالت نے ایک خاتون کو غیر قانونی طور پر گانے ڈاؤن لوڈ کرنے کے جرم میں دو لاکھ بائیس ہزار ڈالر جرمانے کی سزا سنائی ہے۔
ریاست مِنیسوٹا کی رہائشی بتیس سالہ جیمی تھامس کو یہ جرمانہ چوبیس مختلف نغمے انٹرنیٹ پر صارفین کو مہیا کرنے کے الزام میں ادا کرنے کو کہا گیا ہے۔ دوسرے الفاظ میں انہیں فی گانا نو ہزار دو سو پچاس ڈالر کے جرمانے کی سزا ہوئی ہے۔
مختلف ریکارڈ کمپنیوں کا کہنا ہے کہ اصل میں جیمی تھامس کو اس سے کہیں زیادہ جرمانہ ہونا چاہیئے تھا کیونکہ انہوں نے کل ایک ہزار سات سو دو گانے انٹرنیٹ سے ڈاؤن لوڈ کیے ہیں۔
جیمی تھامس وہ پہلی شخص ہیں جنہیں انٹرنیٹ پر ’فائل شئرنگ‘ کے الزام کا سامنا کرنا پڑا اور انہوں نے عدالت میں اس کے دفاع کا فیصلہ کیا۔
ہر سال لاکھوں لوگ میوزک فائل ایک دوسرے سے شئر کرنے کے مرتکب ہوتے ہیں جس کے بارے میں ریکارڈ کمپنیوں کا کہنا ہے کہ اس سے انہیں شدید مالی نقصان ہو رہا ہے۔
غیر قانونی طور پر میوزک شئر کرنے کے جرم میں امریکہ میں اب تک چھبیس ہزار لوگوں کے خلاف قانونی چارہ جوئی ہو چکی ہے لیکن زیادہ تر لوگ چند ہزار ڈالر کا جرمانہ دیکر ایسے معاملات عدالت سے باہر ہی طے کر لیتے ہیں۔
تاہم جیمی تھامس اگر اس سزا کے خلاف اپیل کرتی ہیں تو ماہرین کے مطابق انہیں دو سو پچاس ہزار ڈالر تک کے اخراجات برداشت کرنا پڑیں گے۔
جیمی تھامس کے وکیل برائن ٹوڈر نے خبررساں ادارے ایسوسی ایٹڈ پریس کو بتایا کہ جیمی تھامس عدالت کا فیصلہ سن کر رو پڑیں۔
دوسری جانب امریکی ریکارڈ کمپنیوں کا کہنا ہے کہ اس فیصلے سے لوگوں کو معلوم ہوگا کہ غیر قانونی میوزک ڈاؤن کرنے اور اسے دوسرے لوگوں کو مہیا کرنے کی سزا کتنی سخت ہو سکتی ہے۔[hr]
