غزل

[AbdulRasheed1]

خموش صُبحیں، اُداس شامیں۔


 خموش صُبحیں، اُداس شامیں، تِرا پتہ مُجھ سے پُوچھتی ھیں
بتاؤں کیا اب کہ یِہ فضائیں پلٹ کے کیا مُجھ سے پُوچھتی ھیں

اُداس چِڑییں جو دِن کو دانے کی کھوج میں تِھیں، ھیں لوٹ آئی
کہاں ھے شاخ شجر کہ جِس پر تھا گھونسلہ مُجھ سے پُوچھتی ھیں

تُمہیں تو صحرا نوردیوں میں کمال ھے، کُچھ ھمیں بتاؤ
کمال کی ھیں جو ہستیاں آبلہ پا، مُجھ سے پُوچھتی ہیں

فقِیہِہ شہرِ بلا نے مُجھ کو تو مُدّتوں سے ھے قید رکھا
عدالتیں ھیں کہ اب کہیں جا مِری خطا مُجھ سے پُوچھتی ھیں

کوئی تعلّق، کوئی بھی ناتا نہیں رھا ھے تو نہ سہی اب
یہ پاک بازوں کی ٹولیاں کُچھ بھی کیوں بھلا مُجھ سے پُوچھتی ھیں

فصِیلِ شہرِ اماں کی یارو خُدا سے ھم خیر ما نگتے ھیں
بلائیں کیا کیا مِرے نگر کا ھی راستہ مُجھ سے پُوچھتی ھیں

وفا کے شِیشے کی کِرچِیوں کے سمیٹنے کا کوئی سلِیقہ؟
بتاؤ حسرتؔ، بڑی ادا سے، پری ادا مُجھ سے پُوچھتی ھیں۔


(رشید حسرتؔ کوئٹہ)

[AbdulRasheed1]

گُلوں کی پالکی میں ھے۔

گُلوں کی پالکی میں ھے، بہاروں کی وہ بیٹی ھے
چہیتی چاند کی روشن سِتاروں کی وہ بیٹی ھے

ھماری عِزّتیں سانجھی ھیں، بولی کوئی بھی بولیں
کِسی بھی ایک کی عِفّت، سو چاروں کی وُہ بیٹی ھے

وُہ  چلتی ھے تو راہوں میں سُریلے ساز بجتے  ھیں
کِسی اُجلی ندی کے شوخ  دھاروں کی وہ بیٹی ھے

کِیا ھے بے رِدا جِس نے مِرے دہقاں   کی بیٹی کو
وطن کے نام لیوا غمگُساروں کی وہ بیٹی ھے

بڑی مُدّت تلک جس بہن کو ھم نے عدُو سمجھا
سِتم سہتی  رہی ھے، کوہساروں  کی وہ بیٹی ھے

سُرِیلی بانسری کی تان اُس کی گُفتگُو ٹھہری
تراشِیدہ پری  رُخ شاہکاروں کی وہ بیٹی ھے

ھماری  زِندگی بے کیف گُزری ھے رشید حسرتؔ
نہیں جِس میں کوئی سُکھ، ریگزاروں کی وُہ بیٹی ھے۔

رشید حسرتؔ کوئٹہ۔