حُسن ِ اظہار کو رہوار بنایا اپنا

[یاور عظیم]

[center]غزل

حُسن ِ اظہار کو رہوار بنایا اپنا
یُوں تغزل میں یہ معیار بنایا اپنا

اور ہوں گے جنہیں دنیا کی طلب ہوتی ہے
ہم نے دنیا کو طلب گار بنایا اپنا

ہم نے سُورج کی طرف اپنی ہتھیلی کر دی
دھوپ کے دشت میں چھتنار بنایا اپنا

آپ کا حال اگر لائق ِ اظہار نہ تھا
کیوں کسی شخص کو غمخوار بنایا اپنا

خواہش ِ دولت ِ دنیا کو بسا کر دل میں
سفر ِ زیست نہ دُشوار بنایا اپنا

دُوسری بار کسی اور کا ہونے نہ دیا
ہم نے جس شخص کو اک بار بنایا اپنا

رات اک منزل ِ خورشید کو پانے کے لیے
چاند کو قافلہ سالار بنایا اپنا

زندگی بھر جو ترے کام نہ آئے یاور!
کس لیے تُو نے اُنہیں یار بنایا اپنا

یاور عظیم[/center]

[اضواء]

بہترین غزل پئش کرنے پر آپ کا شکریہ

[یاور عظیم]

بہت شکریہ اُضوا..

[زین]

[center]غزل
اور ہوں گے جنہیں دنیا کی طلب ہوتی ہے
ہم نے دنیا کو طلب گار بنایا اپنا

دُوسری بار کسی اور کا ہونے نہ دیا
ہم نے جس شخص کو اک بار بنایا اپنا

یاور عظیم[/center]

واقعی آپ دل کو چھو جانے والی شاعری کرتے ہیں
بہت اعلی اور زبردست
شکریہ آپ کا

[پپو]

[یاور عظیم]

زین بھائی آپ کو غزل پسند آئی..مجھے میری محنت کا ثمر مل گیا.. آپ کا بے حد شکریہ.
پپو آپ بھی ہمیشہ مری حوصلہ افزائی کرتے ہیں.. سلامت رہیں ... شاد رہیں.