آگے بڑھے نہ قصۂ عشقِ بتاں سے ہم ۔ حالی

[سخنور]

آگے بڑھے نہ قصۂ عشقِ بتاں سے ہم
سب کچھ کہا مگر نہ کھُلے رازداں سے ہم

اب بھاگتے ہیں سایۂ عشقِ بتاں سے ہم
کچھ دل سے ہیں ڈرے ہوئے کچھ آسماں سے ہم

خود رفتگیِ شب کا مزا بھولتا نہیں
آئے ہیں آج آپ میں یارب کہاں سے ہم

دردِ فراق و رشکِ عدو تک گراں نہیں
تنگ آگئے ہیں اپنے دلِ شادماں سے ہم

جنت میں تُو نہیں اگر اے زخمِ تیغِ عشق
بدلیں گے تجھ کو زندگئ جاوداں سے ہم

لینے دو چین کوئی دم اے منکر و نکیر
آئے ہیں آج چھوٹ کے قیدِ گراں سے ہم

ہنستے ہیں اس کے گریۂ بے اختیار پر
بھولے ہیں بات کہہ کے کوئی رازداں سے ہم

اب شوق سے بگاڑ کی باتیں کیا کرو
کچھ پا گئے ہیں آپ کے طرزِ بیاں سے ہم

دلکش ہے ایک قطعۂ صحرا ہے راہ میں
ملتے ہیں جا کے دیکھیے کب کارواں سے ہم

لذّت ترے کلام میں آئی کہاں سے یہ
پوچھیں گے جا کے حالیِ جادو بیاں سے ہم

(مولانا الطاف حسین حالی)

[سخنور]

مہدی حسن کی آواز میں یہی غزل سننے کے لئے اس لنک[link]http://as01.cooltoad.com/music/download ... 58ea4ff101[/link] سے یہ غزل ڈاونلوڈ کریں۔

[شازل]

بہت خوب
اور اس پر مہدی حسن کی آواز سونے پر سہاگہ ہے

[رضی الدین قاضی]

خوبصورت شیئرنگ کے لیئے بہت شکریہ۔

[چاند بابو]

بہت خوب سخنور بھیا بہت بہت شکریہ اتنی اچھی غزل شئیر کرنے کا اور اس کی گائیکی مہیا کرنے کا۔