نہ جنوں میں تشنگی ہے، نہ وصال ِ عاشقانہ

[فاروق درویش]

نہ جنوں میں تشنگی ہے، نہ وصال ِ عاشقانہ
مری زندگی کا شاید، یہیں تھم گیا زمانہ

نہ صدا ہے محرموں کی، نہ نظر وہ ساحرانہ
نہ وفا ہے دوستوں کی، نہ عطائے دلبرانہ

مرے ہجر کے فسانے ہیں مکاں سے لا مکاں تک
نہ چمن نہ گل نہ بلبل، نہ بہار و آب و دانہ

مرے غم کدے کی شامیں ہیں تیرے بنا غریباں
ہے مزاج ِ شب بھی کافر، تیرا غم بھی قاتلانہ

میں جو تھک گیا سفر میں، میرے آبلوں نے چھیڑا
وہی راگ ِ دشت و صحرا، بہ نوائے تازیانہ

یہ منافقت کی بستی ھے کہ دور مصلحت کا
جو نقاب ِ زرق اوڑھے، ھے جہان ِ کافرانہ

پس ِ مرگ خامشی یہ ھے حلیف ِ دست ِ ظلمت
تری چپ ھے تیری قاتل کہ مزاج ِ بذدلانہ

مرے طرز ِ حق نوائی پہ ہے اعتراض ان کو
جو صدائے عاشقاں کو، کہیں فقر ِمشرکانہ

یہ کمال ِ د ل فریبی ہے ترے سخن میں درویش
جو فقیر بن کے چھیڑا ہے رباب ِ خسروانہ

فاروق درویش



۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔
اردو ادب و سخن میں دلچسبی رکھنے والے اور نئے لکھنے والوں کی رہنمائی کیلئے بحر، ہندسی اوزان اور ایک شعر کی تقطیع دی جا رہی ہے


بحر ۔ بحر رمل مثمن مشکول


ارکان ۔۔۔۔۔۔۔۔۔۔۔۔۔۔۔۔۔ فَعِلات ۔۔۔۔۔ فاعِلاتُن ۔۔۔۔۔۔ فَعِلات ۔۔۔۔۔۔ فاعِلاتُن
ہندسی اوزان ۔۔۔۔۔۔ ۱۲۱۱۔۔۔۔۔۔ ۲۲۱۲۔۔۔۔۔۔۔۔ ۱۲۱۱۔۔۔۔۔۔۔۔ ۲۲۱۲

تقطیع

نہ ج نوں کی ۔۔۔۔۔۔۔۔ ۱۲۱۱
تشن گی ہے ۔۔۔۔۔۔۔۔ ۲۲۱۲
نہ و صا لے ۔۔۔۔۔۔۔۔ ۱۲۱۱
عا ش قا نہ ۔۔۔۔۔۔۔۔۔ ۲۲۱۲

مری زن د ۔۔ ۔۔۔۔۔۔ ۱۲۱۱
گی کا شا ید ۔۔۔۔۔۔۔ ۲۲۱۲
ی ہی تھم گ ۔۔۔۔۔ ۱۲۱۱
یا ز ما نہ ۔۔۔۔۔۔۔۔۔۔ ۲۲۱۲

نوٹ ۔۔۔۔ کا ، کے، کی، ھے، ھیں، ہوں، وہ، یہ ، نہ، جو، میں، گے، گی جیسے الفاظ کو 1 میں باندھنا بھی درست ھے اور 2 میں بھی ۔۔۔۔۔۔۔۔۔۔ نون غنہ اور ھ کا وزن تقطیع میں شمار نہیں ھو گا ۔۔۔۔۔

اشارہ : حضرت اقبال کی مشہور غزل " تجھے یاد کیا نہیں ہے مرے دل کا وہ زمانہ'' اور مرزا غالب کی بہترین غزلوں میں شامل غزل " یہ نہ تھی ہماری قسمت کہ وصال ِ یار ہوتا " بھی اسی بحر میں لکھی گئی ہیں

[سیما]

بہت شکریہ زبردست لکھا ہے آپ نے

[شازل]

بہت خوب

[چاند بابو]

بہت خوب محترم فاروق صاحب ایک اچھی شئیرنگ کے ساتھ ساتھ رہنمائی کا بہت بہت شکریہ.

[بلال احمد]

شیئرنگ کیلئے شکریہ جناب

[اضواء]

ماشاء اللہ ... اللھم زید و بارک ....

بہت ہی بہترین رہنمائی ہے

آپ کا شکریہ ....