[/center]خراج عقیدت کی مستحق ہیں وہ شخصیتیں اور ادارے جو معاشرے میں اچھی اور مفید روایتیں قائم کر جاتی ہیں۔ ثقافت انہی روایتوں سے جلا پاتی ہے اور یہی روایتیں انفرادی اور اجتماعی زندگی کو روشنی، شیرینی اور علم عطاءکرتی ہے۔ شہید پاکستان حکیم محمد سعید اور ہمدرد فاﺅنڈیشن نے اعتراف علم جبکہ ہمدرد یونیورسٹی نے فروغ علم کی جو روایت قائم کی ہے وہ مادیت کے اس عہد میں قابل ستائش ہے۔ شہید پاکستان حکیم محمد سعید کی خدمات علم و حکمت سے لیکر فہم و ادراک تک پاکستان کے حوالے سے ہمیشہ تاریخ کا روشن باب رہیں گی۔ حکیم محمد سعید شہید صرف طبیب ہی نہیں بلکہ حکیم بھی تھے۔ وہ اپنے وقت کے صاحب علم و حکمت تھے۔ ان کی عقابی نظریں علم طب ہی تک محدود نہیں تھیں بلکہ شعبہ ہائے زندگی کے ہر شعبے پر جن کا تعلق علم و حکمت سے ہے ان کی نظر گہری تھی۔ چنانچہ طب قدیم، طب جدید، قدیم سائنس، جدید سائنس اور تعلیم نونہالان، ثانوی اور اعلا ثانوی سے لے کر جامعات تک کی تعلیم کے متعلق بھی انہوں نے بڑی حکمت سے کام لیاتھا۔
یہ عظیم شخصیت آج موجود ہوتیں تو پاکستان کی نباتاتی دولت سے حکمت کے میدان میں وہ معجزے کر دکھاتی جس کا تصور ”بونے“ کبھی نہیں کرسکتے لیکن مجھے حکیم محمد سعید کی شہادت پر تعجب بھی نہیں اس لئے کہ ہمیشہ قدآور ہی پست ذہنیت والے بونوں کے ہاتھوں شہید ہوتے آئے ہیں۔17 اکتوبر سے 20اکتوبر تک حکیم محمد سعید کے یوم شہادت کے حوالے سے ان کی یاد میں تقریبات کا اہتمام کیا جاتا ہے۔ ان کو شہید کرنے والے پاکستان دشمنوں کو یہ معلوم ہی نہیں تھا کہ اتنی بڑی شخصیت کا نام و نشان اس طرح نہیں مٹایا جاسکتا بقول شاعر
[center]کتنے سادہ ہیں تیرا نام مٹانے والے
کبھی پتھر کی لکیریں بھی مٹا کرتی ہیں[/center]
پودوں کی ادویاتی اہمیت اور اس کی افادیت کا جو ادراک شہید حکیم محمد سعید کو تھا وہ پاکستان میں کسی اور کے حصے میں تاحال نہیں آیا نہ ہی اس حوالے سے کتابی، علمی اور عملی طور پر کسی شخصیت کی طرف سے کوئی بڑی پیش رفت دیکھنے میں آئی ہے۔ ان کی بصارت اور بصیرت کا اندازہ ان کے دو اقتباسات سے بخوبی لگایا جاسکتا ہے جس میں وہ لگی لپٹی رکھے بغیر حق سچ بات بڑے سیدھے اور سادہ الفاظ میں کہہ دیتے تھے۔
17 اکتوبر 1998ء میں انہیں کراچی میں شہید کر دیا گیا جس کا الزام متحدہ قومی موومنٹ MQM پر لگاتے ہیں اور اس سلسلے میں موجودہ گورنر سندھ عشرت العباد کا نام خاص طور پر لیا جاتا ہے۔ عشرت العباد کے گورنر سندھ بن جانے کے بعد یہ کیس دبا دیا گیا ہے جس سے یہ الزام حقیقت کے قریب ترین سمجھا جاتا ہے۔ جس وقت انہیں آرام باغ میں ان کے دواخانہ کے باہر وحشیانہ فائرنگ کرکے قتل کیا گیا وہ روزہ کی حالت میں تھے یوں انہوں نے روزہ کی حالت میں اپنی جان جانِ آفریں کے سپرد کی۔ ان کا معمول تھا کہ وہ جس روز مریضوں کو دیکھنے جاتے روزہ رکھتے تھے چونکہ ان کا ایمان تھا کہ صرف دوا وجہ شفاء نہیں ہوتی۔ حکیم محمد سعید پاکستان کے بڑے شہروں میں ہفتہ وار مریضوں کو دیکھتے تھے۔ سب سے اہم بات یہ تھی کہ وہ مریضوں کا مفت علاج کرتے تھے۔ ان کا ادارہ ھمدرد بھی ایک غیر منافع بخش ادارہ ہے جس کی تمام تر آمدنی ریسرچ اور دیگر فلاحی خدمات پر صرف ہوتی ہیں۔
